GUTAHA KU MUGARAGARO IKARABIRO RUSANGE

Muri gahunda yo gukomeza kwirinda no kurwanya icyorezo cya Covid 19, abaturage barema isoko rya Mukamira, riherereye mu Kagari ka Rugeshi, Umurenge wa Mukamira, Akarere ka Nyabihu, bagejejweho uburyo bugezweho bwo gukaraba intoki hifashishijwe robine bategaho intoki maze amazi akizana.

Iri karabiro rusange rya kijyambere rije risimbura kandagirukarabe abaturage bari basanzwe bakoresha, zikaba zatumaga batonda imirongo miremire. Ubu bwogero bwatashywe ku mugaragaro kuri uyu wa kane, tariki ya 18 Kamena 2020, igikorwa cyitabiriwe n’inzego zitandukanye; Umuyobozi w’Akarere wungirije ushinzwe imibereho myiza y’abaturage,  Bwana Simpenzwe Pascal, abakozi bahagarariye umushinga USAID Isuku iwacu, abakozi ku rwego rw’Akarere n’urw’Umurenge.

Iki gikorwa cyagezweho ku bufatanye n’umushinga USAID Isuku iwacu. Umuyobozi w’Akarere wungirije ushinzwe imibereho myiza yaboneyeho umwanya wo kubashimira by’umwihariko kubera inkunga bateye Akarere. Uyu muhango witabiriwe kandi n’Umunyamabanga Nshingwabikorwa w’Umurenge wa Mukamira, Bwana Munyansengo Fred ndetse n’abaturage barema iri soko.

Mu butumwa bwose bwatanzwe kandi hongeye gushimangirwa ibyiza byo gukaraba neza intoki nk’uburyo bwo kwirinda no gukumira icyorezo cya Covid19.