ABASIRIKARE BIGA MU ISHURI RYA NYAKINAMA BASUYE IBIKORWA BYA BYAKOZWE N'UMUSHINGA WA SEBEYA

Kuri uyu wa 3 Mata 2026, Umuyobozi w’Akarere, Mme Mukandayisenga Antoinette, yakiriye itsinda ry’abasirikare biga mu Ishuri Rikuru rya Gisirikare rya Nyakinama, basura ibikorwa by’umushinga wa Sebeya. Uru ruzinduko rwari rugamije kureba ishyirwa mu bikorwa rya politiki y’Igihugu yo kwita ku bidukikije hagamijwe guteza imbere imibereho myiza n’umutekano by’umuturage.

Abasuye bageze mu mirenge ya Bigogwe, Mulinga na Rambura, aho basuye ibikorwa by’amaterasi y’indinganire ndetse banaganiriza abaturage. Abaturage bagaragaje ko uyu mushinga wabafashije kongera umusaruro, bavuga ko wikubye hafi kabiri, ndetse banashimangira ko ibiti byatewe bifatanyije n’imyaka bifasha kurwanya isuri no kubungabunga ubutaka.

Bamwe mu bagize itsinda ryasuye batanze ibitekerezo by’uko hakongerwa imbaraga mu kurinda imyaka udukoko, hifashishijwe imiti ijya iterwa mu masaha ya nimugoroba. Bavuze ko ibi byafasha kurinda ibinyabuzima bifitiye akamaro ibidukikije, birimo n’inzuki, bityo bikarushaho guteza imbere ubuhinzi burambye.