ICYUMWERU CY’UMUJYANAMA, UMWANYA WO KWEGERA ABATURAGE

Mu gihe cy’Icyumweru cy’Umujyanama cyabaye kuva ku wa 17 kugeza ku wa 19 Kamena 2026, abagize Inama Njyanama basuye ibikorwa bitandukanye mu mirenge byagezweho binyuze mu mihigo y’umwaka wa 2025/2026 ndetse bagirana ibiganiro n’abaturage ku ngingo zinyuranye.

Muri icyo gihe, hibanzwe ku gusura ibikorwa by’iterambere byagezweho mu nzego zitandukanye hagamijwe kureba aho ishyirwa mu bikorwa ry’Imihigo rigeze n’uruhare byagize mu kuzamura imibereho myiza y’abaturage.

Abagize Inama Njyanama banabonanye n’abaturage mu biganiro byagarutse ku mikorere n’inshingano z’Inama Njyanama, ishyirwa mu bikorwa ry’Imihigo, ndetse na gahunda zitandukanye za Leta zigamije guteza imbere imibereho y’abaturage no kubafasha kwihutisha iterambere.

Abaturage bahawe umwanya wo gutanga ibitekerezo, kugaragaza ibibazo bahura na byo ndetse no gutanga ibitekerezo byafasha kunoza serivisi no kurushaho kunoza ishyirwa mu bikorwa rya gahunda za Leta. Ni igikorwa cyafashije gukomeza umubano mwiza hagati y’abaturage n’inzego z’ibanze, no gushimangira uruhare rwabo mu bikorwa by’iterambere.

Icyumweru cy’Umujyanama cyaranzwe no gusuzuma ibyagezweho, gukurikirana ishyirwa mu bikorwa ry’Imihigo no gukomeza kwegera abaturage hagamijwe iterambere rirambye n’imiyoborere myiza.