Kintobo:Meya Mukandayisenga yakiriye Hon.Dusingizemungu mu muganda usoza ukwezi kwa Werurwe

Igikorwa cy’umuganda usoza ukwezi kwa Werurwe cyabereye mu mirenge yose igize Akarere ka Nyabihu, ku rwego rw’akarere kibera mu Murenge wa Kintobo. Abayobozi n’abaturage bafatanyije gusana umuhanda wa Kintobo–Nturo uherereye mu Kagari ka Gatovu, igikorwa cyagaragaje ubufatanye bukomeye mu guteza imbere ibikorwa remezo.

Uyu muganda witabiriwe na Senateri Dusingizemungu Jean Pierre wakiriwe n’Umuyobozi w’Akarere, Madamu Antoinette Mukandayisenga. Mu butumwa bwatanzwe, hibanzwe ku kwirinda no gukumira ibiza, guteza imbere isuku nk’umuco, kurengera ibidukikije binyuze mu gutera ibiti, kunoza imirire n’ubuzima, guteza imbere siporo, no gukoresha neza ibigo by’imari harimo no kwishyura MUSA ku gihe.

Abaturage banahawe ibiganiro ku nshingano z’Inteko Ishinga Amategeko umutwe wa Sena, bashishikarizwa gukomeza kubungabunga umutekano, kurwanya ingengabitekerezo ya jenoside no kwitegura neza Kwibuka ku nshuro ya 32 Jenoside yakorewe Abatutsi mu Rwanda mu 1994.