Kuri uyu wa mbere, tariki ya 10 Mata 2023, ku rwibutso rw’Akarere ka Nyabihu, ruherereye mu Murenge wa Mukamira, abagize Urugaga rw’abikorera mu Ntara y’Iburengerazuba bibutse ku nshuro ya 29 jenoside yakorewe abatutsi. Umushyitsi mukuru muri iki gikorwa yari Guverineri w’Intara y’Iburengerazuba, Bwana Habitegeko Francois, hari kandi Abadepite mu Nteko ishinga amategeko; Hon. Bakundufite Christine na Hon. Ayinkamiye Speciose. Ku rwego rw’Urugaga rw’abikorera(PSF), hari Chairman, Bwana Nkurunziza Erneste wavuze  mu izina rya PSF ku rwego rw’Intara y’Iburengerazuba.

Abashyitsi bose ndetse n’abandi bitabiriye igikorwa bakiriwe n’Umuyobozi w’Akarere ka Nyabihu, madamu Mukandayisenda Antoinette ari kumwe n’abagize inama y’umutekano itaguye y’Akarere.

Uyu muhango wo kwibuka waranzwe n’ibikorwa bitandukanye, birimo ubuhamya kuri jenoside yakorewe abatutsi, ubutumwa bw’umuryango wa Ibuka, ubutumwa bw’Umuyobozi w’Urugaga rw’abikorera ku rwego rw’Intara y’Iburengerazuba, ubutumwa bwa Guverineri w’Intara y’Iburengerazuba akaba n’umushyitsi mukuru w’uyu munsi, gusura no gushyira indabo ku rwibutso, umuhango wo gutanga inka zatanzwe na PSF.

Umushyitsi mukuru mu butumwa yatanze yashimiye abagize PSF ku rwego rw’Intara y’Iburengerazuba kuba barateguye igikorwa cyo kwibuka jenoside yakorewe abatutsi no kugabira inka abarokotse jenoside batishoboye. Yakomeje asaba abitabiriye igikorwa bo mu Karere ka Nyabihu by’umwihariko ndetse n’ahandi muri rusange, gukomeza gushyira imbaraga mu kurwanya ingengabitekerezo ya jenoside.