Ku gicamunsi cyo ku wa 28 Kanama 2025, Bwana SIMPENZWE Pascal, Umuyobozi w'Akarere wungirije ushinzwe imibereho myiza y’Abaturage mu Karere ka Nyabihu, yifatanyije n’Umunyamabanga Nshingwabikorwa w’Umurenge wa Shyira, hamwe n’intumwa zaturutse mu muryango Imbuto Foundation ziyobowe na Bwana HARERIMANA Félicien, mu muhango wo gusinya imihigo n’abatujwe mu mudugudu w’icyitegererezo wa Kaziranka binyuze muri gahunda ya “IWACU”.

Gahunda ya “IWACU” ni imwe mu bikorwa bifatika Imbuto Foundation ishyira mu bikorwa ku bufatanye na Minisiteri y’Ubutegetsi bw’Igihugu, mu rwego rwo gushyigikira gahunda z’ubuyobozi bwiza, guteza imbere imibereho myiza y’abaturage mu midugudu batuyemo, no guteza imbere umuco w’ubufatanye mu kwiyubakira igihugu.

Mu ijambo rye, Bwana SIMPENZWE Pascal yashimye uruhare rw’abaturage mu gushyigikira gahunda za Leta, anabashishikariza guharanira imibereho myiza no gukomeza kwita ku isuku n’iterambere ry’ibikorwa bagejejweho. Yagize ati:

“Gusinya imihigo si igikorwa cyo kuzuza umuhango gusa, ni isezerano hagati yanyu n’igihugu. Iyo muyitabiriye mutyo, muba mwerekanye ko mushishikajwe no gutera imbere kandi mukabigira ibyanyu.”

Bwana HARERIMANA Félicien, uhagarariye Imbuto Foundation, yagaragaje ko intego ya gahunda ya “IWACU” atari ukubatuza gusa, ahubwo ari ugutuma buri muturage agira uruhare mu iterambere rye no mu mibereho myiza y’umuryango. Yagize ati:

“Twifuzaga ko uyu mudugudu uba icyitegererezo atari mu nyubako gusa, ahubwo no mu kwesa imihigo mumaze gusinya, mukaza ku isonga mu Midugudu yose y’Icyitegererezo iri mu Gihugu.”

Umudugudu w’Icyitegererezo wa Kaziranka wubatswe mu buryo bugezweho, ugizwe n’inzu zigezweho,amazi meza n’amashanyarazi ukaba waratashywe ku mugaragaro mu mwaka wa 2017.