Umuyobozi ushinzwe imitegekere n'imicungire y'Abakozi mu Karere, Bwana NDASUBIRA Innocent, kuri uyu wa Kane yitabiriye umuhango wateguwe hagamijwe guha ibikoresho by’ibanze by’akazi abarangije amasomo y’umwuga w’ubudozi, mu rwego rwo kubashyigikira no kubafasha gutangira urugendo rwo kwihangira imirimo. 

Uyu muhango wabereye ku kigo cya Center for Hope VTC, giherereye mu Murenge wa Jenda kuri uyu wa 04 Nzeri 2025, aho abanyeshuri 101 barangije amasomo yabo hagati y’umwaka wa 2022 kugeza 2025 bahawe ibikoresho bizabafasha gutangira gukora ku giti cyabo.

Mu ijambo rye, Bwana NDASUBIRA yashimye ubuyobozi bw’iki kigo ku ruhare kigira mu guteza imbere imyuga, by’umwihariko ubudozi, ndetse anashimira abarangije amasomo ku bushake bagaragaje bwo kwiga no kurangiza neza. Yabibukije ko ibikoresho bahawe ari intangiriro y’inzira yo kwigira, abasaba kubibyaza umusaruro no gushyira hamwe mu matsinda kugira ngo barusheho gukomera mu bikorwa byabo. Yagize ati: “Ibi bikoresho si impano ahubwo ni ishoramari, mube intangarugero mu kubibyaza umusaruro.”

Abanyeshuri bahawe ibikoresho na bo bashimye iki gikorwa, bavuga ko kibahaye icyizere cyo kwiteza imbere no gutanga umusanzu wabo mu iterambere ry’igihugu. Bamwe muri bo bagaragaje ko hari aho bagiye guhita batangira gukorera kandi bashimangiye ko amasomo bahawe mu kigo cya Center for Hope VTC yabahaye ubumenyi buhagije bwo kwinjira ku isoko ry’umurimo, kandi biteguye kubyaza umusaruro amahirwe bafite.

Umuhango wasojwe n'igikorwa  cyo gushyikiriza buri munyeshuri imashini idoda. Ubuyobozi bw’Akarere bwijeje ubufatanye mu gukomeza kubakurikirana, hagamijwe kongera ubumenyi no gutuma imishinga yabo iramba kandi igira uruhare mu guteza imbere imibereho myiza yabo n’iy’imiryango yabo.

Center for Hope VTC ni ishuri ry'imyuga yigihe gito (short courses) cy’amezi 6. Ryatangiye muri Nyakanga mu 2022. Ni ishuri rifite intego yogufasha impunzi zasoje amashuri yisumbuye ariko ntibagire amahirwe yokujya muri kaminuza, rinafasha urubyiruko n'abandi batishoye kwiga imyuga.