Ku gicamunsi cyo ku wa 19 Kanama 2025, bayobowe na perezida warwo, Hon. NYIRAHABINEZA Valerie, bakomiseri b’Urwego rushinzwe gusubiza mu buzima busanzwe abahoze mu mitwe yitwaje intwaro (RDRC) bakoreye uruzinduko mu Ntara y’Iburengerazuba, aho bakiriwe n’ubuyobozi bw’Akarere ka Nyabihu ku bufatanye n’inzego z’umutekano. Urwo ruzinduko rwari rugamije gushimangira ubufatanye hagati ya RDRC n’ubuyobozi bw’inzego z’ibanze mu guteza imbere abagenerwabikorwa b’uru rwego, binyuze muri gahunda zo kubateza imbere bakibona mu iterambere ry’igihugu.

Mu gusoza uruzinduko, bakomiseri ba RDRC basuye Umudugudu w’Icyitegererezo wa Bihinga, uri mu murenge wa Jenda, akagari ka Rega, aho bamwe mu bagenerwabikorwa ba RDRC basanzwe baravuye mu buzima bwa gisirikare bagasubizwa mu buzima busanzwe batuye. Batanze insimburamaguru kandi abo baturage bashimira byimazeyo Nyakubahwa Perezida wa Repubulika, Paul Kagame, ku bw’ubuyobozi bwiza bwatumye bagarurirwa agaciro binyuze mu miturire ibereye Umunyarwanda n’ubufasha bubafasha kwiyubaka no kugira uruhare mu iterambere ry’igihugu.

Umudugudu wa Bihinga, nk’uko byagaragajwe n’abayobozi, ni ishusho nyayo y’icyerekezo cy’u Rwanda cyo kudasiga n’umwe inyuma, kikaba kigaragaza intambwe imaze guterwa mu guteza imbere gahunda z’ubumwe n’ubwiyunge, gusubiza mu buzima busanzwe abari abasirikare no guharanira iterambere rirambye.