Kuri uyu wa gatatu, tariki ya 15 Gicurasi 2024, mu Mudugudu wa Kaburembe, Akagari ka Rubaya, Umurenge wa Mukamira, Akarere ka Nyabihu, habereye igikorwa cyo gutangiza imirimo yo kubaka ishuri rya Rwanda Coding Academy rizubakwa ku bufatanye bwa Leta y’u Rwanda n’Igihugu cya Korea.

Iri shuri rizafasha abanyeshuri ba Rwanda Coding Academy basanzwe bigira mu mashuri bahuruyeho na Nyabihu TSS ndetse rikazafasha mu kongera umubare w’abigira muri iryo shuri.

Uyu muhango wo gutangiza ibikorwa byo kubaka witabiriwe na Ambasaderi wa Repubulika ya Korea mu Rwanda, Nyakubahwa Taong Woo Jin wari kumwe n’Umuyobozi mukuru wa ( Korea International Cooperation Agency (KOICA), Kim Jin hwa, Umuyobozi mukuru wa Rwanda TVET Board(RTB), Bwana Umukunzi Paul wari uhagarariye Minisitiri w’Uburezi n’abandi bashyitsi batandukanye; bakiriwe n’Umuyobozi w’Akarere ka Nyabihu wungirije ushinzwe imibereho y’abaturage, Bwana Simpenzwe Pascal ari kumwe n’abahagariye inzego z’umutekano mu Karere ka Nyabihu ndetse n’abakozi ku rwego rw’Akarere n’Umurenge.

Umuhango w’uyu munsi waranzwe n’ibikorwa bitandukanye birimo; gusobanura igishushanyo mbonera cy’ishuri rigiye kubakwa, gushyira ibuye ry’ifatizo ahazubakwa iri shuri. Biteganyijwe ko imirimo yo kubaka izamara amezi cumi n’umunani(18) uhereye uyu munsi, igikorwa cyasojwe no gusura abanyeshuri ba Rwanda Coding Academy.