Uyu munsi, ku wa kabiri, tariki ya 25 Werurwe 2025, hatangijwe  icyumweru cyahariwe kugaragaza ibyagezweho mu kwimakaza Ihame ry’uburinganire, imbongamizi zigihari no kuzifatira ingamba kugira ngo zikurweho.

Ni igikorwa cyateguwe ku bufatanye bw’Intara y’Iburengerazuba na Gender Monitoring Office (GMO), kikaba cyatangijwe ku itariki ya 25 Werurwe 2025 kikazasozwa ku wa 01/4/2025 mu Mirenge yose igize Akarere ka Nyabihu, ku rwego rw’Akarere gitangirizwa mu Murenge wa Mukamira, Akagari ka Rurengeri, Umudugudu wa Kabyaza, cyitabirwa n’Umuyobozi w’Akarere, Madamu Mukandayisenga Antoinette ari kumwe n’Umuyobozi w’Akarere wungirije ushinzwe imibereho y’abaturage, Bwana Simpenzwe Pascal, Umuyobozi w’ishami ry’imiyoborere myiza mu Karere, Bwana Niyonteze Ignace n’abandi bakozi ku rwego rw’Akarere,  Umurenge n’Akagari.

Muri iki gikorwa hatanzwe ubutumwa bwibanze ku kwimakaza Ihame ry’uburinganire mu muryango nk’isoko y’iterambere ry’umuryango, kurwanya ihohotewra rikorerwa mu miryango kuko ridindiza iterambere ryawo, kubana mu buryo bwemewe n’amategeko kuko birengera abagize umuryango, kwandikisha abana mu bitabo by’irangamimerere, kwimakaza umuco w’ibiganiro mu muryango…

Nyuma yo kuganirizwa n’abayobozi, abitabiriye na bo bahawe umwanya wo gutanga ibitekerezo n’ibyifuzo no kugaragaza ibibazo, ibibazo byabajijwe byasubijwe ibindi bihabwa umurongo.