Kuri iki cyumweru, tariki ya 29 Gicurasi 2022, mu Mudugudu wa Nanga, Akagari ka Cyamabuye, Umurenge wa Karago, Akarere ka Nyabihu, habereye umuhango wo kwibuka ku nshuro ya 28, inzirakarengane zazize jenoside yakorewe abatutsi mu mwaka w’1994, ni muri gahunda y’imisi ijana (100) yo kwibuka.

Iki gikorwa cyItabiriwe na Guverineri w’Intara y’Uburengerazuba, akaba n’umushyitsi mukuru, Bwana Habitegeko Francois ari kumwe na Madamu we. Umuhango witabiriwe kandi na Honorable Depite Bakundufite Christine, abahagarariye ubuyobozi mu nzego zitandukanye, ari izikorera mu Karere n’ahandi, bakiriwe n’Umuyobozi w’Akarere ka Nyabihu, Madamu Mukandayisenga Antoinette.

Abafashe umwanya w’ijambo bose bagiye  bihanganisha abarokotse jenoside yakorewe abatutsi, basaba abafite amakuru y’aho imibiri y’abatutsi bishwe ko bagomba kuyatanga kugirango na yo ishyingurwe mu cyubahiro, babibutsa kandi ko bagomba kwirinda ingengabitekerezo ya jenoside aho iva ikagera.

Mu gusoza uyu muhango, umushyitsi mukuru akaba yashyikirije inka umuturage warokotse jenoside yakorewe abatutsi, iyo nka ikaba yaraguzwe n’abaturage,  muri gahunda yo kumuremera kuko iyo yari atunze abagizi ba nabi bayitemye.

Umuhango ukaba washojwe n’igikorwa cyo gushyira indabo ku Rwibutso rwa Nanga, ahashyinguwe imibiri y’abazize jenoside yakorewe abatutsi mu mwaka w’1994.

Twibuke twiyubaka!