Ku wa 25 Ukwakira 2025, Minisitiri w’Ubutegetsi bw’Igihugu akaba n’Imboni ya Guverinoma mu Karere ka Nyabihu, Bwana HABIMANA Dominique, yifatanyije n’Ubuyobozi bw’Akarere, Inzego z’Umutekano ndetse n’Abaturage b’Akagari ka Nyarutembe mu Murenge wa Rugera, mu muganda rusange usoza ukwezi.

Uyu muganda wari ugamije guteza imbere ibikorwa by’iterambere n’ibidukikije, aho hatewe ibiti 8,500 bivangwa n’imyaka ku buso bungana na hegitari 2. Ni igikorwa cyashimangiye gahunda y’igihugu yo kurengera ibidukikije no guteza imbere ubworozi n’ubuhinzi burambye, hagamijwe kongera umusaruro n’imibereho myiza y’abaturage.

Insanganyamatsiko y’iki gikorwa yagiraga iti: “Igiti cyanjye, umurage wanjye.”

Nyuma y’umuganda, Minisitiri HABIMANA Dominique yagiranye ikiganiro kirambuye n’abaturage, yibutsa akamaro ko kwitabira gahunda za Leta zose zibafasha mu buzima bwa buri munsi. Yagarutse ku ngingo z’ingenzi zirimo:

• Gukomeza kwimakaza isuku mu ngo no mu midugudu
• Gukaza ingamba z’umutekano, cyane cyane mu kurwanya inzoga z’inkorano zishobora guhungabanya ubuzima n’umutekano
• Indangamuntu y’ikoranabuhanga izahabwa abaturage mu rwego rwo kunoza serivisi no koroshya imikorere ya Leta.

Minisitiri yashimiye abaturage uburyo bitabira umuganda n’izindi gahunda z’igihugu, abasaba gukomereza aho no kuba ku isonga mu kubungabunga umutekano n’ibikorwa remezo byagezweho.

Abaturage nabo bashimiye Guverinoma uburyo ikomeje kubashyigikira mu iterambere ry’ubuzima bwabo n’imibereho myiza, biyemeza gukomeza gufatanya mu bikorwa byose bigamije guteza imbere Akarere ka Nyabihu n’igihugu muri rusange.