Mu rwego rwo korohereza abaturage  imigenderanire mu Karere ka Nyabihu cyane  cyane mu Tugari twa Nyagahondo na Tyazo two Murenge wa Rugera ,hateguwe gukora umuhanda Tubungo-Nyakiriba. 

Uretse kongera ubuhahirane n’itumanaho hagati y’abaturage n’inzego zitandukanye, uyu muhanda uzagira uruhare runini mu koroshya ubwikorezi, kongera igiciro cy’umusaruro ku isoko;uyu muhanda uzafasha kugera ku mashuri harimo abanza n’ayisumbuye agera kuri arindwi(7),kandi uzoroshya urugendo rugana ku bigo nderabuzima n’amavuriro arimo Ikigonderabuzima cya Nyakiriba n’Ibitaro bikuru by’Akarere bya Shyira no bigabanye ibihe by’amage ku barwayi bagezwa kwa muganga mu gihe gito.Ni umuhanda kandi uzoroshya urugendo rugana ku ruganda rutunganya amashanayrazi rwa Nyamyotsi.

Ni umuhanda usaga ibirometero bitanu (5.8 km) ukaba uri gushyirwamo Laterite itsindagiye. Byari biteganyijwe ko imirimo yo kuwukora izarangira kuwa 25 Nzeri 2025. Iki gihe kikaba gishobora kuzarenga bitewe n’imbogamizi zitandukanye zirimo imvura nyishyi yaguye ikadindiza ibyakorwaga.

Umushinga wo gukora umuhanda Tubungo –Nyakiriba watangiye gushyirwa mu bikorwa kuva tariki ya 12 Kamena 2023, nyuma yaho Akarere kagiranye amasezerano na ba Rwiyemezamiri JV EPOS & GEMT bagombaga kuwukora ku giciro cya 2,198,924,459 Frw na T and M Construction Ltd bagombaga gukurikirana imirimo y’iki gikorwa ku giciro cya 139,000,000 Frw mu gihe kingana n’amezi cumi n’umunani.