Uyu munsi ku wa 15 Ukwakira 2025, mu Murenge wa Mulinga mu Kagari ka Rwantobo, Umudugudu wa Musenyi mu Karere ka Nyabihu hizihijwe umunsi mpuzamahanga w’umugore wo mu cyaro ku nsanganyamatsiko igira iti: “Umugore ni uw’Agaciro”. 

Ni ibirori byahujwe no gutangiza ukwezi kwahariwe umuryango bikaba byitabiriwe n’Umuyobozi w’Akarere wungirije ushinzwe imibereho myiza y’abaturage,Bwana SIMPENZWE Pascal, ari kumwe n’izindi nzego zinyuranye harimo Komiseri w’Ubukungu muri CNF y’Intara y’Iburengerabuza, Madame Angélique TWAGIRAMUNGU.

Mu bikorwa byaranze ibi birori, habayeho igikorwa cyo guhemba abagore bahize abandi mu bikorwa bitandukanye biteza umuryango imbere no kuremera igishoro abatoranijwe bafite ubushake bwo gukora imishinga iciriritse.

Mu ijambo rye, Bwana SIMPENZWE Pascal yashimiye abagore bo mu cyaro ku ruhare rukomeye bagira mu iterambere ry’imiryango n’Igihugu muri rusange. Yabasabye gukomeza kwihangira imirimo no guharanira kugira uruhare mu bukungu bw’Igihugu, avuga ko “iterambere ry’Igihugu ridashoboka hatabayeho uruhare rw’umugore n’umuryango ufite intego.”

Madame Angélique TWAGIRAMUNGU, Komiseri w’Ubukungu muri  CNF ku rwego rw’Intara y’Iburengerazuba, yatanze ubutumwa bugaruka ku ihame ry’uburinganire n’ubwuzuzanye, imyitwarire y’abangavu, n’uruhare rw’umugore mu iterambere ry’umuryango Nyarwanda. Yamurikiriye ba Mutimawurugo imihigo bagomba kuzesa mu rwego rwo gukomeza guteza imbere imibereho y’imiryango.

 Ibi birori byasize abitabiriye bishimira intambwe u Rwanda rumaze gutera mu guteza imbere umugore, cyane cyane uwo mu cyaro, nk’inkingi y’iterambere rirambye;koko “UMUGORE NI UW’AGACIRO.”