Kuri uyu wa kabiri, tariki ya 27 Ugushyingo 2018, Itsinda ry’Abadepite bagize Komisiyo y’Uburezi, Ikoranabuhanga, Umuco n’Urubyiruko, basuye Akarere ka Nyabihu. Iri tsinda ryari riyobowe na Honorable Depite UWIRINGIYIMANA Philibert wari kumwe na Honorable Depite AHISHAKIYE Mediatrice na Honorable Depite NDAGIJIMANA Leonard. Abagize itsinda bakoranye inama n’abayobozi ndetse n’abakozi bafite aho bahurira n’ ibikorwa remezo bishingiye ku ikoranabunga n’uko bikoreshwa mu gutanga serivisi zigezwa ku baturage harimo serivisi zitangwa hifashishijwe urubuga rw’ Irembo.gov.rw. ; abadepite barebye niba abaturage bashobora gukoresha telefone ngendanwa mu guhamagara no kohereza ubutumwa nta mbogamizi, imitangire ya serivisi zo kubitsa no kubikuza amafaranga hifashishijwe telefone(Mobile money,Tigo cash na Airtel money). Baboneyeho umwanya wo kumenya niba abaturage bumva radiyo kandi bakareba Televiziyo y’u Rwanda nta mbogamizi, kureba aho ikwirakwiza ry’umuyoboro wa Interineti rigeze no kureba uko Interineti ifasha abaturage mu byo bakenera. Abagize iri tsinda bamenye akamaro ikoranabuhanga rifitiye abaturage b’Akarere ka Nyabihu haba mu mibereho yabo ndetse no mu iterambere ryabo. Barebeye hamwe imbogamizi zaba zirimo kugira ngo bazakore ubuvugizi ku nzego zibishinzwe. Nyuma y’inama abadepite basuye abaturage b’Umurenge wa Mulinga, Akagari ka Gisizi, aho basanze muri rusange bakoresha ikoranabuhanga n’ubwo atari bose kuko hari igice kinini cyagaragaye ko kidafite Network ya MTN, TIGO ndetse na Airtel.