Umuyobozi w’Akarere ka Nyabihu, Madamu Mukandayisenga Antoinette ari kumwe n’Umuyobozi w’Inama Njyanama y’Akarere ka Nyabihu, Bwana Gasarabwe Jean Damascene, bakiriye Honorable Senator Nyinawamwiza Laetitia ari kumwe na Prof. Harelimana Jean Bosco;  Umuyobozi mukuru w’Ikigo cy’Igihugu cy’Amakoperative( RCA), aho bagiranye ikiganiro  kuri uyu wa gatatu, tariki ya 04 Werurwe 2020 n’abagize Komisiyo y’ubukungu mu Nama Njyanama y’Akarere, abakozi ku rwego rw’Akarere bafite amakoperative mu nshingano, abayobozi b’amakoperative bahagarariye abandi.

Muri iki kiganiro hagaragajwe imikorere y’amakoperative mu Karere ka Nyabihu muri rusange, hagaragazwa kandi ibyo iri tsinda rya Komisiyo ya Sena y’iterambere ry’ubukungu n’imari ryabonye mu makoperative atanu ryasuye mu gihe cy’iminsi ibiri; ayo makoperative ni KOAIKA, KOZAMIKOKI, COIMU, COOPTEGA na SACCO Isoko y’amajyambere ya Mukamira.

Hatanzwe ibitekerezo bigamijwe ko amakoperative agomba kugira uruhare mu guteza imbere abanyamuryango bayo, atanga inyungu y’ubwasisi ku banyamuryango buri mwaka. Ubuyobozi bw’Akarere bwiyemeje ko bugiye kurushaho gukurikirana imikorere y’amakoperative;

Hagaragajwe ikibazo cya Koperative ya COIMU yifuza guhabwa ikusanyirizo ry’ibirayi basaba ko cyakwitabwaho kugira ngo ikomeje kwiteza imbere. Iki kiganiro kandi cyitabiriwe n’Umuyobozi w’Akarere wungirije ushinzwe iterambere ry’ubukungu, Bwana Habanabakize Jean Claude.