Kuri uyu wa gatatu, tariki ya 28 Nzeri 2022, Umuyobozi w’Akarere ka Nyabihu wungirije ushinzwe imibereho myiza, Bwana Simpenzwe Pascal yakiriye itsinda riyobowe na Peresida wa Board ya CRS ku rwego rw’isi, Bwana Briana Wenger ari kumwe n’abandi bayobozi bagize board y’umushinga CRS n’abandi bayobozi ba CRS Rwanda harimo uhagarariye CRS na Chief of party umuyobozi wa program ya Gikuriro kuri bose , umushinga ukorera mu Karere ka Nyabihu.

Igikorwa nyirizina cyari ugusura ibikorwa by’ Umushinga Gikuriro kuri bose ikorera mu Karere ka Nyabihu ndetse no kuganira n’abagenerwabikorwa b’umushinga Gikuriro kuri bose, urwo ruzinduko rukaba rwakorewe mu Murenge wa Mukamira , Akagali ka Rugeshi, Umudugudu wa Cyinkenke.

Muri cyo gikorwa hakaba hasuwe Irerero rigizwe n’ibyumba bibiri (2) birererwamo abana bari hagati y’imyaka 3-6 bagezwaho serivisi mbonezamikurire , habaye igikorwa cya cooking demonstration aho basobanuriwe ibikorwa bikorerwa ku Midugudu, aho ababyeyi bigishwa gutegura indyo yuzuye ndetse banahabwa inyigisho zibafasha kwita ku muryango ndetse n’umwana by’umwihariko, ndetse no kwigishwa urahare rw’akarima k’igikoni mu gutegura indyo yuzuye, barebeye hamwe uruhare rw’umushinga mu kwita no gutanga service ku bana bafite ubumuga, ndetse no kurebera hamwe uruhare rw’amatsinda yo kwizigamira hagamijwe kuzamura ubushobozi  bw’umuryango no gufasha mu gukumira no kurwanya imirire mibi n’igwingira.

Abashyitsi bashimye ibikorwa bya Gikuriro kuri bose ndetse  na Gikuriro Program  ku ruhare byagize ku gukumira no kurwanya imirire mibi n’igwingira mu bana bato mu Karere ka Nyabihu, aho bagaragaje nk’ Akarere , mu kugabanya igwingira ryavuye kuri 59% rigera kuri 47.6% ni intambwe ishimishije, kandi ko ubufatanye bwa CRS n’Akarere binyuze mu mushinga batera inkunga buzakomeza.

Umuyobozi w’Akarere wungirije ushinzwe imibereho myiza y’abaturage  mu ijambo rye yashimiye  ubuyobozi bwa CRS ku bikorwa bigamije iterambere ry’imibereho myiza y’abaturage bakomeje gukorera mu Karere ka Nyabihu, aho yagarutse ku ruhare rwa Gikuriro Program,  akomeza avuga ko Gikuriro kuri bose ifatanyije n’Akarere bazakora ibishoboka  byose intego yabo yo gukumira no kurwanya imirire mibi n’igwingira mu bana bato ikagerwaho.